Sevmedi

SEVMƏDİ
*****
Çoxu həsrətimi çəkib sovruldu
Mən sevdiyim insan məni sevmədi.
Çoxu aşiq oldu,yandı,qovruldu
Mən sevdiyim insan məni sevmədi.
**
Sevgi gözlərimdə çırağım oldu
Sədaqət,etibar sorağım oldu
Qürurum ən böyük yarağım oldu
Mən sevdiyim insan məni sevmədi.
**
Eyləyə bilmədim eşqimi izhar
Məni anlamadı o vəfasız yar
Sinəmi dağladı bunca ahu-zar
Mən sevdiyim insan məni sevmədi.
**
Xəyalı bir anlıq getməz gözümdən
Hüzün əskik olmur əsla üzümdən
Tərk edib taqətim getdi dizimdən
Mən sevdiyim insan məni sevmədi.
**
Doldu ürəyimə həsrət,intizar
Bu geniş dünyamız oldu mənə dar
Vədəsiz saçıma səpələndi qar
Mən sevdiyim insan məni sevmədi.
**
Döndü fəlakətə sevgimin sonu
Məhəbbət geyindi ayrılıq donu
Züleyxa eşqiylə sevsəm də onu
Mən sevdiyim insan məni sevmədi.